Deontas Ciste na Struchtúr Stairiúil (CSS)

Cé atá in ann iarratas a dhéanamh?

Tá an ciste oscailte d’úinéirí agus caomhnóirí de:

• Struchtúir ar Thaifead na Struchtúr atá faoi Chosaint nó iad siúd a bheartaítear a chur ar an Taifead
• Struchtúir laistigh de Limistéir Chaomhantais Ailtireachta (LCA)
• Struchtúir laistigh den chonláiste Séadchomhartha Náisiúnta

Cé mhéad atá ar fáil?

Is scéim um chistiú meaitseála í CSS, lena gciallaítear gur gá don iarratasóir a bheith in ann idir 20% - 50% den mhaoiniú a sholáthar chun costais an tionscadail a chlúdach. Tá trí shruth de mhaoiniú ar fáil faoi CSS.

Sruth 1

Deontais idir €15,000 - €50,000 le haghaidh deisiúchán riachtanach agus oibreacha caipitiúla beaga a bhaineann le hathchóiriú agus le caomhnú struchtúr stairiúil. Cuirtear ar fáil le foshruth de Shruth 1 maoiniú d’aghaidheanna siopaí stairiúla agus d’aghaidheanna siopaí atá trí mheán na Gaeilge.

Sruth 2

Deontais idir €50,000 agus €200,000 le haghaidh tionscadal níos mó feabhsaithe, athchóirithe nó athúsáid a bhaineann le struchtúir oidhreachta. Ní mór don iarratas leas soiléir, poiblí, pobail nó cónaithe a léiriú do na hoibreacha atá á ndéanamh. Tabhair faoi deara go bhféadfadh cead pleanála a bheith ag teastáil ó na tionscadail seo.

Sruth 3 - Sruth Dúchasach

Is éard is struchtúr dúchasach atá ann ná struchtúr a thógtar trí úsáid a bhaint as modhanna traidisiúnta agus ábhair áitiúla, agus nach raibh aon phlean foirmiúil ina thógáil. Tugtar leis an sruth seo deontais €5,000 go dtí €10,000 le haghaidh deisiúchán caomhnaithe do struchtúir dhúchasacha nach bhfuil curtha san áireamh ar Thaifead an Údaráis Áitiúil ar Struchtúir atá faoi Chosaint agus nach bhfuil cosanta de réir dlí in aon chaoi eile.

Conas a dhéantar measúnú ar iarratais?

Déantar measúnú ar iarratais bunaithe ar na critéir seo a leanas:

• Tábhacht an struchtúir
• Éifeachtach na n-oibreacha chun cuspóirí an chiste a bhaint amach
• Caighdeán na modheolaíochta agus fiúntas teicniúil na n-oibreacha molta
• Cuidiú na n-oibreacha beartaithe chun an struchtúr a choimeád in úsáid nó é a thabhairt ar ais chun úsáide
• Leas poiblí nó pobail níos leithne an tionscadail (do thionscadail a fhaigheann maoiniú faoi Shruth 2 amháin)

Conas a chuirfidh mé iarratas isteach?

Tugtar maoiniú do Chiste na Struchtúr Stairiúil go bliantúil, lena gciallaítear go bhfuil sé oscailte d’iarratais le linn tréimhse áirithe gach bliain. Chun tuilleadh eolais a fháil faoi iarratas a dhéanamh ar an scéim, is féidir leat teagmháil a dhéanamh le d’údarás áitiúil.