Deontas Leathnaithe Gnó
Dearadh an deontas Leathnaithe Gnó chun cabhrú le gnólachtaí beaga nua sa chéim fáis tar éis na tréimhse tosaigh 18 mí. Cuirtear ar fáil é trí Oifigí Fiontair Áitiúla mar chuid de réimse tacaíochtaí le cabhrú le gnólachtaí Éireannacha fás agus bláthú.
Cé atá i dteideal iarratas a dhéanamh?
Féadfar Deontais Leathnaithe Gnó a bhronnadh ar thrádálaithe aonair, ar chomhpháirtíochtaí nó ar chuideachtaí teoranta a chomhlíonann na critéir seo:
- Fiontar nach bhfuil níos mó ná deichniúr ag obair ann. (I gcásanna áirithe, ag brath ar chritéir áirithe, d'fhéadfadh gnólachtaí a bhfuil 10 bhfostaí nó níos mó acu a bheith incháilithe. Chun tuilleadh eolais a fháil, labhair le d’Oifig Fiontair Áitiúil.
- Fiontar a bunaíodh, a cláraíodh agus a bhíonn ag oibriú laistigh de shuíomh geografach na hOifige Fiontair Áitiúil.
- Fiontar a reáchtáiltear ar bhonn tráchtála.
- Fiontar a léiríonn go bhfuil margadh aige dá tháirge nó dá sheirbhís.
- Fiontar a bhfuil acmhainneacht aige maidir le fás gnó agus cruthú post.
Cé mhéad atá ar fáil?
Is é an t-uasmhéid Deontais Leathnaithe Gnó atá ar fáil 50% den infheistíocht nó €80,000, cibé acu is lú.
I gcásanna eisceachtúla d'fhéadfadh deontais os cionn €80,000 agus suas le €150,000 a bheith ar fáil. Ní bhronntar iad sin ach ar thionscadail a léiríonn go soiléir go bhféadfadh céim a bhaint amach i bhFiontraíocht Éireann agus/nó easpórtáil go hidirnáisiúnta.
Faoi réir na teorann 50%, beidh feidhm ag deontas uasta €15,000 le haghaidh gach post lánaimseartha a chruthófar maidir le haon tacaíocht fostaíochta a thugtar.
Cad é is féidir a dhéanamh leis an deontas?
Féadfar caiteachas a mheas faoi na ceannteidil seo a leanas:
- Míreanna caipitil
- Costais tuarastail
- Costais Chomhairleoireachta/ Nuálaíochta/ Margaíochta
- Forchostais ghinearálta
Conas iarratas a dhéanamh?
Chun iarratas ar dheontas féideartha a phlé, déan teagmháil le d'Oifig Fiontair Áitiúil agus iarr cruinniú. Faigh a gcuid sonraí teagmhála anseo.
Foghlaim tuilleadh faoi d'Oifig Fiontair Áitiúil
Is í an Oifig Fiontair Áitiúil an t-ionad ilfhreastail má tá eolas nó tacaíocht de dhíth ort maidir le cuideachta a bhunú nó a fhorbairt in Éirinn. Tá Oifig Fiontair Áitiúil i ngach limistéar údarás áitiúil. Agus 31 foireann dírithe go hiomlán ar an gcineál sin oibre ar fud na n-údarás áitiúil in Éirinn, tá réimse leathan taithí, scileanna, agus seirbhísí faoi do réir ach iad a iarraidh ar an Oifig Fiontair Áitiúil i do cheantar. Tá cuntas iomlán ar na tacaíochtaí atá ar fáil ón Oifig Fiontair Áitiúil ar LocalEnterprise.ie.