Iasacht Mhicreamhaoiniúcháin Éireann
Is iasachtóir neamhbhrabúis é Micreamhaoiniúchán Éireann (MFI) a thairgeann iasachtaí do ghnólachtaí beaga chun cabhrú leo fás. Bunaíodh é chun tacú le cuideachtaí a mbeadh deacrachtaí acu maoiniú a fháil ó bhainc agus ó iasachtóirí tráchtála eile murach sin. Oibrítear go dlúth le hOifigí Fiontair Áitiúla, agus tairgtear iasachtaí gnó ó €2,000 go €25,000.
Tá réimse tairiscintí iasachta ar fáil ag MFI chun cabhrú le gnólachtaí tosú, fás agus leathnú. Cuireann siad iasachtaí éigeandála ar fáil freisin do chuideachtaí a bhfuil tionchar ag COVID -19 agus an Breatimeacht orthu. Is féidir féachaint ar a gcuid tairiscintí iasachta go léir anseo https://microfinanceireland.ie/loan-packages-22/
Gnéithe agus sochair Iasacht MFI
- Ráta úis laghdaithe ar phraghasriosca iomlán 5.5% má chuirtear isteach é trí d'Oifig Fiontair Áitiúil. (Beidh feidhm ag praghasriosca iomlán 6.5% má chuireann tú d'iarratas isteach go díreach chuig Micreamhaoiniúchán Éireann.)
- Rochtain ar thacaíochtaí gnó, comhairle agus meantóireacht má dhéantar iarratas trí d'Oifig Fiontair Áitiúil
- Suimeanna Iasachta Gnó idir €2,000 agus €25,000
- Téarmaí iasachta idir 1 agus 5 bliana
- Gan aon táillí ná muirir
- Aisíocaíochtaí seasta gan aon phionós as aisíocaíocht luath
Cé atá i dteideal iarratas a dhéanamh?
Aon ghnó (trádálaí aonair, comhpháirtíocht nó cuideachta theoranta) atá lonnaithe in Éirinn a bhfuil níos lú ná 10 bhfostaí ann agus láimhdeachas bliantúil suas le €2m acu. Áirítear leis sin cuideachtaí nach bhfuil in ann maoiniú a fháil ó bhanc nó ó sholáthraí tráchtála.
Conas iarratas a dhéanamh?
Labhair le d'Oifig Fiontair Áitiúil faoi iarratas a dhéanamh ar iasacht MFI. Faigh a gcuid sonraí teagmhála anseo.
Is féidir le d'Oifig Fiontair Áitiúil sonraí a chur ar fáil maidir leis na téarmaí agus coinníollacha, agus conas iarratas a ullmhú agus a chur isteach.
Foghlaim tuilleadh faoi d'Oifig Fiontair Áitiúil
Is í an Oifig Fiontair Áitiúil an t-ionad ilfhreastail má tá eolas nó tacaíocht de dhíth ort maidir le cuideachta a bhunú nó a fhorbairt in Éirinn. Tá Oifig Fiontair Áitiúil i ngach limistéar údaráis áitiúil. Agus 31 foireann dírithe go hiomlán ar an gcineál sin oibre ar fud na n-údarás áitiúil in Éirinn, tá réimse leathan taithí, scileanna, agus seirbhísí faoi do réir ach iad a iarraidh ar an Oifig Fiontair Áitiúil i do cheantar. Tá cuntas iomlán ar na tacaíochtaí atá ar fáil ón Oifig Fiontair Áitiúil ar LocalEnterprise.ie.