Scéim Athnuachana Bailte agus Sráidbhailte

Cé atá in ann iarratas a dhéanamh?

Is féidir le grúpaí i mbailte agus i sráidbhailte ina bhfuil daonraí de 10,000 nó níos lú tograí a chur isteach le haghaidh maoinithe faoin scéim sin.

D’fhéadfaí plé le tograí ó bhailte ina bhfuil daonraí de suas le 15,000 freisin nuair a bhíonn géarghá le hinfheistíocht agus nuair a bheidh tionchar suntasach ag an tionscadal ar an mbaile.

Cad iad na cineálacha tionscadal a mhaoinítear?

Maoinítear tionscadail faoin scéim sin a chuireann le beocht eacnamaíoch nó shóisialta an bhaile nó an tsráidbhaile. D’fhéadfadh tionscadail trína ndéantar an méid a leanas a bheith san áireamh le samplaí:

• An sráid-dreach a fheabhsú
• Spásanna glasa nó taitneamhachtaí áineasa a chruthú i lár an bhaile nó an tsráidbhaile
• Bonneagar a chur ar fáil chun tacú le margaí sna bailte agus sna sráidbhailte, amhail margaí feirmeoirí nó margaí ceardaithe
• Foirgnimh thréigthe nach bhfuil áitithe a athúsáid mar spásanna pobail
• Ionaid pobail atá ann cheana a athchóiriú

Ní mór tionscadail a chur i gcrích laistigh de thréimhse ama 12 mhí go 18 mí.

Cé mhéad airgid atá ar fáil?

Is féidir leis an údarás áitiúil suas le cúig thionscadal a roghnú gach bliain:

• Is féidir le ceann amháin de na cúig thionscadal deontas uasta de €500,000 a fháil.
• Is féidir leis na ceithre thionscadal eile a roghnófar deontas uasta de €250,000 a fháil.
• Is ionann an deontas íosta  atá ar fáil agus €20,000.

Cad é mar a roghnófar tograí?

Roghnófar tograí i bpróiseas iomaíoch trína ndéantar measúnú ar an méid a leanas:

• Cé chomh maith agus a chomhlíonann an tionscadal aidhmeanna na scéime
• Réasúnaíocht an tionscadail
• Luach ar airgead
• Cé chomh réadúil agus atá sé an tionscadal a bhaint amach laistigh den tréimhse ama riachtanach

Conas a chuirfidh mé iarratas isteach?

A luaithe agus a fhógraíonn an Roinn Forbartha Tuaithe agus Pobail an scéim gach bliain, cuireann údaráis áitiúla gairm amach ar thograí ó ghrúpaí i mbailte agus i sráidbhailte.

Is féidir le gach údarás áitiúil suas le cúig thogra ar an iomlán a roghnú ó bhailte agus ó shráidbhailte i gceantar an údaráis áitiúil. Ní féidir leo níos mó ná togra amháin a roghnú ó bhaile nó sráidbhaile aonair.

Chun togra a chur isteach, déan an fhoirm um Léiriú Spéise a íoslódáil agus a chomhlánú ó shuíomh gréasáin d’údaráis áitiúil. Féach ar shuíomh gréasáin d’údaráis áitiúil le haghaidh sonraí iomlána mair le cur isteach d’iarratais, lena n-áirítear an dáta deiridh.