Deontas Feabhsúcháin Luaidhe Tí
Leis an Scéim Deontais um Leasúchán Luaidhe Baile, cuidítear le teaghlaigh píobáin nua a chur in áit na bpíobán luaidhe ina gcuid córas dáileacháin uisce óil inmheánach.
Is baol cruthaithe don tsláinte í an luaidhe. Tugann Feidhmeannacht na Seirbhíse Sláinte (HSE) le fios nach bhfuil ann do leibhéal sábháilte luaidhe in uisce óil. Suas go dtí na 1970idí, d’úsáidtí luaidhe go minic le haghaidh píobáin i gcórais pluiméireachta baile. Mar sin, má tá cónaí ort i dteach níos sine, seans go bhfuil píobáin luaidhe ann. Cuideoidh an scéim deontais seo leat píobáin nua a chur in áit na bpíobán luaidhe sin agus chun neamhchosaint do theaghlaigh ar luaidhe a laghdú.
Cé atá i dteideal iarratas a dhéanamh?
Is féidir le húinéirí-áititheoirí agus tionóntaithe fadtéarmacha d’árais chónaithe iarratas a dhéanamh don scéim.
Le cáiliú, ní mór don teach lena mbaineann a bheith mar an teach a mbíonn tú ag cur fút ann de ghnáth. Mura tusa an t-úinéir, ní mór duit cead a fháil chun na hoibreacha a dhéanamh.
Tá tithe saoire eisiata ón scéim. Níl réadmhaoin atá faoi úinéireacht na n-údarás áitiúil, na gcomhlachas tithíochta agus an FSS incháilithe.
Cé mhéad atá ar fáil?
Soláthraíonn an deontas 100% de chostais suas le €5,000 chun píobáin luaidhe a athsholáthar ina iompraítear uisce óil i do theach. Ní dhéantar tástáil mhaoine lena aghaidh, agus cuirtear ar fáil é cibé acu go bhfaigheann tú d’uisce ó sholáthraí poiblí nó príobháideach uisce.
Conas a chuirfidh mé iarratas isteach?
Déanann na húdaráis áitiúla an scéim deontais a riar. Chun iarratas a dhéanamh, déan teagmháil le d’údarás áitiúil chun an fhoirm éilimh DLRG 1a a fháil. Nuair a fhaigheann d’údarás áitiúil d’iarratas agus nuair a sheiceálann siad an cháipéisíocht, déanfaidh siad d’éileamh a phróiseáil.