Deontas Toibreacha
Más mian leat tobar nua a thochailt, tobar atá ann cheana a uasghrádú, nó córas cóireála a shuiteáil, is féidir iarratas a dhéanamh ar dheontas toibreacha chuig an údarás áitiúil. Cabhraíonn an Scéim Deontais Toibreacha le líonta tí atá ag brath ar sholáthar uisce príobháideach a chinntiú go bhfuil a gcuid uisce glan agus go bhfuil go leor ann chun freastal ar riachtanais an lín tí.
Cé atá in ann iarratas a dhéanamh?
Is féidir iarratas a dhéanamh ar an deontas seo faoi na coinníollacha seo:
- Ní chomhlíonann an soláthar uisce i do theach na caighdeáin cháilíochta riachtanacha, nó níl an méid uisce a sholáthraítear maith go leor chun freastal ar riachtanais an lín tí.
- Is é an teach ina bhfuil an obair le déanamh an áit a bhfuil cónaí ort.
- Ní féidir do theach a cheangal le hUisce Éireann ná le grúpscéim uisce.
- Tógadh do theach ar a laghad 7 mbliana ó shin, agus níor íocadh deontas chun an soláthar uisce a chur ar fáil nó a fheabhsú le 7 mbliana anuas.
Ní thugtar deontas le haghaidh tithe saoire faoin scéim seo.
Cé mhéad airgid atá ar fáil?
Clúdóidh an deontas toibreacha:
- 85% de na costais cheadaithe le haghaidh oibreacha athshlánaithe suas le huasmhéid €3,000
- 85% de na costais cheadaithe chun tobar nua a chur ar fáil suas le huasmhéid €5,000
- 100% den mhaoiniú le haghaidh cóireála ar cháilíocht uisce suas le huasmhéid €1,000
Is é €750 íostairseach an deontais.
Conas a chuirfidh mé iarratas isteach?
Chun iarratas a dhéanamh ar dheontas toibreacha nó chun tuilleadh eolais a fháil, déan teagmháil leis an rannóg uisce tuaithe de chuid an údaráis áitiúil.