Deontas Grúpscéim Uisce
Sa chás go dtagann dhá líon tí nó níos mó le chéile chun a gcóras uisce féin a bhunú agus a bhainistiú, tugtar grúpscéim uisce air sin. Tá deontais ar fáil chun cabhrú le grúpscéimeanna uisce a bhunú i gceantair nach bhfuil rochtain acu ar scéim phoiblí.
Cé mhéad airgid atá ar fáil?
Riarann gach údarás áitiúil an scéim deontais as féin, agus d'fhéadfadh éagsúlacht a bheith i méid iomlán an deontais atá ar fáil. Is iondúil go gclúdaíonn an deontas 85% de chostais na scéime, suas le huasmhéid seasta le haghaidh gach tí. Ní mór do na hiarrthóirí an 15% eile de na costais a chlúdach.
Cén chaoi a ndéantar measúnú ar iarratais?
Déanfaidh an t-údarás áitiúil athbhreithniú ar an iarratas lena chinntiú gur féidir leis dóthain uisce a sholáthar ar bhealach ar féidir brath air le haghaidh na dtithe go léir sa scéim, go bhfuil an t-uisce a sholáthraíonn sé ag teacht leis na caighdeáin riachtanacha cháilíochta, agus nach mbeidh tionchar diúltach ag an scéim ar thithe ar scéimeanna atá ann cheana féin.
Cén uair a n-íocfar an deontas?
Féadfaidh an t-údarás áitiúil íocaíochtaí eatramhacha a dhéanamh de réir mar a fhorbraíonn cúrsaí. Déanfar an íocaíocht deontais deiridh nuair a bheidh an scéim curtha i gcrích agus ag feidhmiú.
Conas a chuirfidh mé iarratas isteach?
Is é an chéad chéim tú féin agus do chomharsana coiste a bhunú ionas gur féidir libh pleananna don scéim a fhorbairt. Nuair a bheidh an coiste curtha ar bun, is féidir teagmháil a dhéanamh leis an rannóg uisce tuaithe de chuid an údaráis áitiúil chun tús a chur leis an iarratas.