Iniúchtaí cíosa príobháideacha
Ní mór go gcomhlíonadh an chóiríocht phríobháideach go léir ar cíos caighdeáin áirithe chun sláinte agus folláine tionóntaí a chosaint. Déanann údaráis áitiúla cigireacht ar chóiríocht phríobháideach ar cíos lena chinntiú go gcomhlíonann sé na caighdeáin riachtanacha.
Áirítear leis na caighdeáin sin:
- Caithfear bail mhaith struchtúrach a bheith ar an teach nó an árasán.
- Ní mór go mbeadh rochtain eisiach ar shaoráidí sláinteachais (seomraí folctha) atá laistigh den teach nó den árasán céanna.
- Ní mór go mbeadh fearais fheistithe i ngach seomra a fhéadann téamh éifeachtach a sholáthar.
- Ní mór go mbeadh neart áiseanna ann chun bia a stóráil, a réiteach agus a chócaráil go sláinteach agus ní mór go mbeifeá in ann rochtain a fháil ar na háiseanna sin laistigh den teach/árasán.
- Ní mór go mbeadh neart aerála ann agus ní mór bail mhaith agus ord oibre a choinneáil air sin.
- Ní mór go mbeadh solas nádúrtha i ngach seomra ar féidir cónaí ann, agus ní mór neart soilse saorga (bolgáin solais) a sholáthar i ngach seomra ar féidir cónaí ann (ní gá go mbeadh solas nádúrtha i halla, staighrí ná léibhinn, ach ba cheart go mbeadh neart soilse saorga acu).
- Ní mór go mbeadh bearta leordhóthanacha i bhfeidhm um shábháilteacht dóiteáin.
- Ní mór go mbeadh rochtain ann ar áiseanna oiriúnacha um stóráil bruscair (araidí) atá cosanta ar lotnaidí agus mhionainmhithe foghla.
- Ní mór bail mhaith agus ord oibre sábháilte a choinneáil ar aon suiteálacha gáis, ola agus leictreachais.
Féadfaidh an t-údarás áitiúil ionaid réadmhaoine a aithint ina bhfuil gá le cigireachtaí cíosa. Is féidir le baill den phobal ábhair imní faoi ionaid réadmhaoine ar cíos a ardú freisin don údarás áitiúil agus féadann cigireacht cíosa tarlú mar thoradh air sin.
Má fhaightear nach bhfuil ionad réadmhaoine ag cloí leis na caighdeáin, féadfar fógra feabhsúcháin a thabhairt ina bhfuil sonraí ar na hoibreacha atá le déanamh ag an tiarna talún laistigh de thréimhse ama shocraithe. Má mhainnítear na hoibreacha sin a dhéanamh d’fhéadfadh go ndéanfaí imeachtaí forfheidhmiúcháin a thionscnamh.