Úinéireacht capall
Ní mór d’aon duine a bhfuil spéis acu úinéireacht a bheith acu ar chapall (lena n-áirítear capaill, asail, miúileanna, ráinigh) a bheith ullamh chun freagrachtaí a ghlacadh chun aire cheart a thabhairt dá n-ainmhithe. Tá na húdaráis áitiúla freagrach as cinntiú go bhfuil úinéirí capall ag leanúint na gceanglas maidir le húinéireacht capall taobh istigh den Limistéar faoi Riail Dearbhaithe.
Limistéar faoi Riail Dearbhaithe chun Capaill a choimeád
Tá an t-údarás áitiúil in ann fodhlíthe a chruthú ina leagtar amach rialacha agus rialacháin maidir le húinéireacht capall taobh istigh de Limistéar faoi Riail. Is é an Limistéar faoi Riail an limistéar ina mbreithníonn an t-údarás áitiúil a bhfuil na Fodhlíthe Rialú Capall i bhfeidhm ann.
Leagtar ceanglais amach leis na fodhlíthe seo lena n-áirítear go bhfuil an méid seo a leanas ag an gcapall:
- Dídean leordhóthanach, in oiriúint dá mhéid
- Limistéir aclaíochta leordhóthanach agus aclaíocht mhinic
- Rochtain ar uisce glan, inólta i gcónaí
- Rochtain ar méid leordhóthanach bia folláin agus/ nó rochtain ar fhéarach leordhóthanach
Cúram tréidlia leordhóthanach
Téigh i dteagmháil le d’ údarás áitiúil chun fáil amach má tá an áit ina bhfuil na capaill á gcoimeád agat nó i gceist a choimeád taobh istigh den Limistéar faoi Riail . Cuirfear aon duine a bhfuil ceadúnas capall acu leis an gClár poiblí d’Úinéirí Capaill.
Ní mór an t-áitreabh ina choimeádfar na capaill a bheith cláraithe leis an Roinn Talmhaíochta, Bia agus Mara.
Ceadúnas Capall
Ní mór d’aon duine a bhfuil capall acu taobh istigh de Limistéar faoi Riail údaráis áitiúil ceadúnas capall a bheith acu.
Chun cur isteach ar cheadúnas capall, beidh ort foirm a líonadh amach agus táille a íoc. Féadfaidh go bhfiafróidh an t-údarás áitiúil díot maidir leis an áit a bhfuil sé beartaithe agat an capall a choimeád agus cén slí a ndéanfaidh tú aire a thabhairt dó lena gcinntítear go bhfuil na caighdeáin á mbaint amach agat maidir le capall a choimeád.
Más mian leat marcaíocht ar do chapall ar bhóthar poiblí, ní mór duit an ceadúnas capall a bhreith leat agus na rialacha bóthair a leanúint maidir le marcaíocht ar chapall.
In éineacht leis an gceadúnas capall, ní mór duit pas capaill, Uimhir Shaoil Uathúil Eachaí (USUE) agus micrishlis leis na sonraí cláraithe leatsa a fháil. Is féidir an pas capaill agus USUE a cheannach ó Eagraíocht fhaofa Eisiúna Pasanna (EEP) agus caithfidh tréidlia an micrishlis a chur isteach.
An féidir leis an údarás áitiúil capall a urghabháil?
Tá freagracht ag na húdaráis áitiúla a chinntiú go bhfuil capaill faoi smacht agus go bhfuil aire mhaith á tabhairt dóibh. Is féidir leo do chapall a urghabháil sna cásanna seo a leanas:
- Má tá do chapall tréigthe nó fáin
- Más cúis le núis é an capall
- Má chruthaíonn an capall baol
Má fuarthas capall agus é ag fánaíocht trí huaire laistigh de thréimhse 12 mhí, is féidir an capall a urghabháil agus ní thabharfar ar ais duit é.
Cad atá le déanamh agat má tá an t-údarás áitiúil tar éis do chapall a urghabháil
Má dhéanann an t-údarás áitiúil do chapall a urghabháil, tabharfar chuig an Póna Capall ainmnithe é. Mura n-éilítear an capall ar ais taobh istigh de chúig lá, is féidir úinéir nua a thabhairt don chapall, é a chur chuig eagraíocht tarrthála nó an capall a chur síos.
Chun do chapall a éileamh ar ais, beidh ort cruthúnas úinéireachta agus doiciméid ábhartha a sholáthar don údarás áitiúil lena n-áirítear an ceadúnas capall, pas capaill agus sonraí maidir leis an gclárúchán micrishlise. Tá táille ann chun do chapall a éileamh ar ais ag brath ar a fhad agus a bhí sé i gcúram an údaráis áitiúil.